ແຂວງຈໍາປາສັກ ເປີດຂະບວນການສັກຢາວັກຊີນກັນພະຍາດແຫ່ງຊາດ ໃນເດັກອາຍຸລຸ່ມ 5 ປີ
-——=========——-
#ວັນທີ 20 ພຶດສະພາ 2024, ພະແນກສາທາລະນະສຸກແຂວງຈໍາປາສັກ ຮ່ວມກັບ ຄະນະພັກ- ອົງການປົກຄອງນະຄອນປາກເຊ, ຫ້ອງການສາທາລະນະສຸກນະຄອນປາກເຊ, ໂຮງຮຽນອະນຸບານ - ປະຖົມແສງອາລຸນ ແລະ ພາກສ່ວນທີ່ກ່ຽວຂ້ອງ ຂອງແຂວງ ແລະ ນະຄອນປາກເຊ ໄດ້ຈັດພິທີເປີດຂະບວນການສັກຢາວັກຊີນກັນພະຍາດແຫ່ງຊາດ (ວສຊ) ໝາກແດງໃຫຍ່ - ໝາກແດງນ້ອຍ ໃນເດັກອາຍຸລຸ່ມ 5 ປີ ທົ່ວແຂວງ. ພິທີຈັດຂຶ້ນຢູ່ໂຮງຮຽນອະນຸບານ - ປະຖົມແສງອາລຸນ ໂດຍການເຂົ້າຮ່ວມຂອງ ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ, ທ່ານ ດຣ.ວຽງສີ ສຸພັກດີ ຫົວໜ້າພະແນກສາທາລະນະສຸກແຂວງ, ທ່ານ ດຣ.ນາງ ພົງພັນ ວິລະພັນ ຮອງເລຂາພັກນະຄອນ ປະທານກວດກາພັກ ຫົວໜ້າອົງການກວດກາລັດນະຄອນປາກເຊ, ທ່ານ ນາງ ດໍາດວນ ວິວາສານ ຫົວໜ້າຫ້ອງການສາທາລະນະສຸກນະຄອນປາກເຊ, ທ່ານ ນາງ ປັນຈະລາ ທອງມະນິລາ ຜູ້ອໍານວຍການໂຮງຮຽນອະນຸບານ - ປະຖົມແສງອາລຸນ. ມີຄະນະກໍາມາທິການ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງ, ຂັ້ນນະຄອນ, ການນໍາໂຮງໝໍແຂວງ, ການນໍາວິທະຍາໄລ ວິທະຍາສາດ ສຸຂະພາບແຂວງ, ທີມງານສູນສຸຂະພາບແມ່ ແລະ ເດັກ, ພະນັກງານແພດໝໍຈາກແຂວງ ແລະ ນະຄອນປາກເຊ, ຜູ້ຕາງໜ້າຈາກອົງການອະນາໄມໂລກ ປະຈຳແຂວງ ຕະຫຼອດຮອດພະນັກງານ, ຄູ - ອາຈານ, ພໍ່ແມ່ຜູ້ປົກຄອງເດັກ ແລະ ລູກຫຼານນັກຮຽນຈາກໂຮງຮຽນອະນຸບານ - ປະຖົມແສງອາລຸນ ເຂົ້າຮ່ວມ.
#ໃນໂອກາດກ່າວເປີດພິທີ, ທ່ານ ດຣ.ວຽງສີ ສຸພັກດີ ຫົວໜ້າພະແນກສາທາລະນະສຸກແຂວງ ລາຍງານວ່າ: ພິທີເປີດຂະບວນການສັກຢາກັນພະຍາດແຫ່ງຊາດ ປ້ອງກັນພະຍາດໝາກແດງໃຫຍ່ – ໝາກແດງນ້ອຍ ຄັ້ງນີ້ ແມ່ນແນໃສ່ຫັນເອົາຂະບວນການຈັດຕັ້ງປະຕິບັດວັນສັກຢາກັນພະຍາດແຫ່ງຊາດ ເພື່ອຄວບຄຸມພະຍາດໝາກແດງໃຫ້ກາຍເປັນໜ້າທີ່ ແລະ ຄວາມຮັບຜິດຊອບຂອງທົ່ວພັກ, ທົ່ວລັດ ແລະ ທົ່ວປວງຊົນໃນທົ່ວແຂວງ ເພື່ອສ້າງເງື່ອນໄຂເຮັດໃຫ້ ວັນສັກຢາກັນພະຍາດແຫ່ງຊາດໃນໄລຍະນີ້ ໃຫ້ບັນລຸຫຼາຍກວ່າ 95% ຂຶ້ນໄປ ທັງສືບຕໍ່ຄວບຄຸມພະຍາດໝາກແດງ ເພື່ອສ້າງເງື່ອນໄຂໃຫ້ປະເທດເຮົາຢັບຢັ້ງ ການລະບາດພະຍາດໝາກແດງ ໃນປີ 2025. ພະຍາດໝາກແດງ ແມ່ນ 1 ໃນ 14ພະຍາດທີ່ສາມາດປ້ອງກັນໄດ້ດ້ວຍການສັກຢາກັນພະຍາດ ໃນນັ້ນລວມມີ ກັນວັນນະໂລກ, ກັນເປ້ຍຫຼ່ອຍໂປລີໂອ, ກັນຄໍຕີບ, ກັນບາດທະຍັກ, ກັນໄອໄກ່, ກັນໝາກແດງໃຫຍ່ - ໝາກແດງນ້ອຍນະໂລກ, ກັນອັກເສບຕັບ ຊະນິດ ບີ, ກັນສະໝອງອັກເສບ, ກັນປອດອັກເສບຮຸນແຮງ, ກັນໄຂ້ສະໝອງອັກເສບ ຍີ່ປຸ່ນ, ກັນໄຂ້ຫວັດລະດູການ, ກັນມະເຮັງປາກມົດລູກ ແລະ ກັນໂຄວິດ 19. ໃນ 14 ພະຍາດ ນີ້ ພະຍາດໝາກແດງໃຫຍ່ ແລະ ພະຍາດໝາກແດງນ້ອຍ ແມ່ນພະຍາດທີ່ຮ້າຍແຮງ ແລະ ແຜ່ຂະຫຍາຍ ໄວກວ່າໝູ່ ທັງແມ່ນສາຍເຫດຂອງການເຈັບເປັນ ແລະ ເສຍຊີວິດອັນຕົ້ນຕໍ ຂອງເດັກນ້ອຍຢູ່ປະເທດກໍາລັງພັດທະນາ ລວມທັງປະເທດເຮົາ.
#ທ່ານ ດຣ.ວຽງສີ ສຸພັກດີ ກ່າວຕື່ມວ່າ: ຈຸດປະສົງຂອງການເປີດຂະບວນການ ວັນສັກຢາກັນພະຍາດແຫ່ງຊາດ ຄັ້ງນີ້ ແນໃສ່ຫັນເອົາວຽກງານສາທາລະນະສຸກລົງສູ່ຮາກຖານ, ໃຫ້ ກາຍເປັນຂະບວນການອັນເປັນປະຈຳຂອງທົ່ວປວງຊົນ ເພື່ອເຮັດໃຫ້ສຸຂະພາບຂອງແມ່ຍິງ ແລະ ເດັກນ້ອຍມີ ຄວາມປອດໄພຈາກການຕິດພະຍາດທີ່ສາມາດກັນໄດ້ດ້ວຍວັກຊິນ, ການສັກຢາ ແລະ ປອດຢາກັນພະຍາດ ມີ ບົດບາດອັນສໍາຄັນທີ່ສຸດໃນຂະ ແໜງການສາທາລະນະສຸກ ເພາະມັນເປັນການກັນພະຍາດໄວ້ລ່ວງໜ້າທີ່ມີ ວິທະຍາສາດ. ເມື່ອແມ່ຍິງ ແລະ ເດັກນ້ອຍ ຫາກໄດ້ຮັບການສັກວັກຊິນຄົບ ເຂົາເຈົ້າກໍ່ຈະມີຊີວິດທີ່ປອດໄພ ຈາກບັນດາພະຍາດຮ້າຍແຮງດັ່ງກ່າວ. ການກັນພະຍາດດ້ວຍການສັກວັກຊິນນັ້ນ ຍັງເປັນການລົງທຶນທີ່ປະຢັດ , ລາຄາຖືກ, ຄຸ້ມຄ່າຕໍ່ການລົງທຶນ ຖ້າທຽບໃສ່ການປິ່ນປົວ ເມື່ອພະຍາດເກີດ. ສິ່ງທີ່ສໍາຄັນ ການສັກຢາກັນພະຍາດ ແມ່ນແນ່ໃສ່ກຸ່ມເປົ້າໝາຍແມ່ຍິງ ແລະ ເດັກນ້ອຍ ເຊິ່ງເປັນກຸ່ມຄົນທີ່ມີຄວາມສ່ຽງ ຕໍ່ການເຈັບເປັນ ແລະ ການຕາຍສູງກ່ວາໝູ່ ໂດຍສະເພາະ ຢູ່ເຂດຫ່າງໄກສອກຫຼີກ, ເຂດ ພູດອຍ, ເຂດເຂົ້າເຖິງຍາກ, ການດໍາລົງຊີວິດຂອງປະຊາຊົນຕິດພັນກັບເສດຖະກິດທີ່ຂຶ້ນກັບທຳມະຊາດ. ການເຈັບເປັນຂອງຜູ້ເປັນ ແມ່ ແລະ ເດັກນ້ອຍ ໄດ້ສົ່ງຜົນກະທົບອັນໃຫຍ່ຫຼວງຕໍ່ ເສດຖະກິດຂອງຄອບຄົວ ແລະ ການສຶກສາຂອງເດັກ. ການເຈັບເປັນຂອງສະມາຊິກໃນຄອບຄົວ ເປັນເຫດຜົນຂອງຄວາມທຸກຍາກ. ຍ້ອນແນວນັ້ນ ພັກ ແລະ ລັດເຮົາ ຈິ່ງໄດ້ຖືເອົາຂະແໜງສາທາລະນະສຸກເປັນ ເປັນ 1 ໃນ 4 ຂະແໜງການຫຼັກ ຂອງການພັດທະນາຊົນນະບົດຮອບດ້ານ ເພື່ອລຶບລ້າງຄວາມທຸກຍາກ ແລະ ສົ່ງເສີມຄວາມສະເໝີພາບຂອງປະຊາຊົນບັນດາເຜົ່າ. ເພື່ອບັນລຸຄາດໝາຍດັ່ງກ່າວຮຽກຮ້ອງໃຫ້ຄະນະກຳມາທິການເພື່ອແມ່ ແລະ ເດັກທຸກຂັ້ນ, ທຸກທ້ອງຖິ່ນ ຈົ່ງຈັດຕັ້ງປະຕິບັດບັ້ນປຸກລະດົມ ໃນຂອບເຂດທ້ອງຖິ່ນຂອງຕົນໃຫ້ທົ່ວເຖິງ, ຮັບປະກັນໃຫ້ຂໍ້ມູນຂ່າວສານ ການນັດໝາຍກ່ຽວກັບວັນສັກຢາກັນພະຍາດແຫ່ງຊາດນີ້ ໄດ້ໄປເຖິງພໍ່ແມ່ພີ່ນ້ອງປະຊາຊົນ ບັນດາເຜົ່າທຸກຖ້ວນໜ້າ, ໃຫ້ຄະນະພັກ - ອົງການປົກຄອງບ້ານຊ່ວຍເກັບກໍາເອົາຈໍານວນເດັກເປົ້າໝາຍ ອາຍຸ ລຸ່ມ 5 ປີພາຍໃນບ້ານຂອງຕົນ ໃຫ້ລະອຽດ ແລະ ນໍາມາຮັບການສັກຢາຢູ່ໃນສະຖານທີ່ບໍລິການສາທາລະນະສຸກ ແລະ ທີມງານແພດໝໍທີ່ລົງໄປສັກຢາ ຢູ່ບ້ານຂອງທ່ານ. ຮຽກຮ້ອງມາຍັງທ່ານ ຫົວໜ້າໜ່ວຍທຸລະກິດ ແລະ ບໍລິການ, ທັງພາກລັດ ແລະ ເອກະຊົນ, ບັນດາອົງການຈັດຕັ້ງສັງຄົມ ຈົ່ງປະກອບສ່ວນໃຫ້ການສະໜັບສະໜູນ ແລະ ໃຫ້ການຮ່ວມມື ໃນວັນສັກຢາກັນພະຍາດ, ຮຽກຮ້ອງພໍ່ແມ່ປະຊາຊົນບັນດາເຜົ່າທຸກຊັ້ນຄົນ ຈົ່ງເຫັນໄດ້ຄວາມສໍາຄັນຂອງ ວັນສັກຢາກັນພະຍາດໝາກແດງ ແຕ່ວັນທີ 20 - 31 ພຶດສະພາ 2024 ນີ້.
#ຈາກນັ້ນ, ທ່ານ ສົມບູນ ເຮືອງວົງສາ ຮອງເຈົ້າແຂວງຈໍາປາສັກ ແລະ ທ່ານ ດຣ.ວຽງສີ ສຸພັກດີ ຫົວໜ້າພະແນກສາທາລະນະສຸກແຂວງ ພ້ອມດ້ວຍການນໍາທີ່ເຂົ້າຮ່ວມພິທີ ກໍໄດ້ໃຫ້ກຽດຍອດຢາວິຕາມິນ ໃຫ້ແກ່ຫຼານນ້ອຍ ຕື່ມອີກ.
*** ຂ່າວ-ພາບ: ທທູນທອງໃຈ 
****ສາທາລະນະສຸກແຂວງຈຳປາສັກ
